سەمەيدەگى مامانداندىرىلعان ارنايى بالەت مەكتەبىندە «الەم بالالارى» ۇجىمىنىڭ بيشىلەرى كونستيتۋتسيا كۇنىنە وراي ۇلتتار دوستىعىن بەينەلەيتىن قويىلىمدى حالىق نازارىنا ۇسىندى.
اتالعان وقۋ ورنىنىڭ ديرەكتورى ءارى ۇجىم جەتەكشىسى, «ەرەن ەڭبەگى ءۇشىن» مەدالىنىڭ يەگەرى, تاتارستان رەسپۋبليكاسنىڭ ەڭبەك سىڭىرگەن مادەنيەت قايراتكەرى كاميليا يسمايلوۆانىڭ ايتۋىنشا, ولار وسىنداي شارالارعا ءجيى اتسالىسىپ وتىرادى.
- «الەم بالالارى» حورەوگرافيالىق بي ءانسامبلى قالاداعى دوستىق ۇيىندە دە مەرەكەگە وراي كوپتەگەن شارالارعا قاتىستى. اباي تەاترىندا ءوتىپ جاتقان مەرەكەگە وراي قويىلىمدارعا بەلسەنە اتسالىسىپ جاتىر. بالەت – ۇزدىكسىز جاتتىعۋدى, تەمىردەي ءتوزىمدى, بەلگىلى ءبىر جەتىستىككە جەتۋ ءۇشىن ۋاقىتتى قاجەت ەتەتىن ونەر,-دەيدى كاميليا يسمايلوۆا,- «الەم بالالارى» ۇجىمى بەكزات ونەردى بالا جاسىنان مەڭگەرگەندەر. حالىقارالىق دەڭگەيدە گران-پري العان ساتتەرىمىز دە وتە كوپ. قازىر ايماقتاردا قازاق بي ونەرىنىڭ قارقىندى دامىپ وتىرعانىن بايقاپ وتىرمىز. سوندىقتان دا ءبىز كلاسسيكالىق بيمەن قاتار ۇلتتىق بي ونەرىنە دە تاربيەلەۋدەمىز. دوستىق ءۇيىنىڭ ءتۇرلى مادەني شارالارىنا «الەم بالالارى» بەلسەنە قاتىسادى.
راۋشان نۇعمانبەكوۆا,
"ەگەمەن قازاقستان"
سەمەي